അന്താരാഷ്ട്ര വനിതാദിനം ആഘോഷിക്കുന്നു.

ഫെയ്മ മഹാരാഷ്ട്ര വനിതാ വേദി യുടെ നേതൃത്വത്തിൽ മാർച്ച് 1 മുതൽ 10 വരെ പത്തുദിവസം നീണ്ടുനിൽക്കുന്ന അന്താരാഷ്ട്ര വനിതാ ദിനാഘോഷങ്ങൾ സംഘടിപ്പിക്കുന്നു

ഉദ്ഘാടനം മാർച്ച് ഒന്നിന്.

മുംബൈ: ഫെഡറേഷൻ ഓഫ് ഓൾ ഇന്ത്യ മറുനാടൻ മലയാളി അസോസിയേഷൻസ് (FAIMA) മഹാരാഷ്ട്ര സംസ്ഥാന വനിതാവേദിയുടെ ആഭിമുഖ്യത്തിൽ ‘ അന്താരാഷ്ട്ര വനിതാ ദിനം – 2026 ‘ വിപുലമായ പരിപാടികളോടെ ആഘോഷിക്കുന്നു. ‘ പെൺകരുത്തിന്റെ പത്തുദിനങ്ങൾ ‘ എന്ന പ്രമേയത്തിൽ മാർച്ച് 1 മുതൽ 10 വരെ നീണ്ടുനിൽക്കുന്ന പത്തുദിവസത്തെ ആഘോഷപരിപാടികളാണ് ആസൂത്രണം ചെയ്തിരിക്കുന്നത്.

മഹാരാഷ്ട്രയിലെ 36 ജില്ലകളിൽ നിന്നുള്ള എല്ലാ മലയാളി വനിതകളെയും ഒരേ വേദിയിൽ അണിനിരത്തുന്ന ഈ സംഗമം ഓൺലൈൻ പ്ലാറ്റ്‌ഫോമുകൾ വഴിയാണ് ഏകോപിപ്പിക്കുന്നത്.
ഉദ്ഘാടന സമ്മേളനം:
മാർച്ച് 1-ന് ഞായറാഴ്ച വൈകുന്നേരം 7:30-ന് ഗൂഗിൾ മീറ്റിൽ നടക്കുന്ന ചടങ്ങിൽ തമിഴ്നാട്, ആന്ധ്ര, തെലങ്കാന, പോണ്ടിച്ചേരി മേഖലകളുടെ നോർക്ക (NRK) ഡെവലപ്‌മെന്റ് ഓഫീസർ അനു പി. ചാക്കോ പരിപാടികളുടെ ഔദ്യോഗിക ഉദ്ഘാടനം നിർവഹിക്കും. വനിതാ വേദി സംസ്ഥാന സമിതി ചെയർപേഴ്സൺ വിനീത പിള്ള അധ്യക്ഷത വഹിക്കുന്ന ചടങ്ങിൽ കൺവീനർ ബോബി സുലക്ഷണ സ്വാഗതം ആശംസിക്കും. ഫെയ്മ മഹാരാഷ്ട്ര ഭാരവാഹികളായ അനു ബി. നായർ, സുമി ജെൻട്രി എന്നിവർ മുഖ്യപ്രഭാഷണം നടത്തും. മഹാരാഷ്ട്രയിലെ വിവിധ സോണുകളെ (മുംബൈ, പൂനെ, നാസിക്, കൊങ്കൺ, മറാഠ് വാഡ, നാഗ്പൂർ, അമരാവതി) പ്രതിനിധീകരിച്ച് രഞ്ജിനി നായർ, പ്രീത ജോർജ്ജ്, ബിജി ഷാജി, പ്രിയ സിസ്, ഹേമലത നായർ, നന്ദിനി രവീന്ദ്രൻ, സുനിത സോമൻ,റോഷ്നി അനിൽകുമാർ തുടങ്ങിയവർ ആശംസകൾ അർപ്പിക്കും.
വൈവിധ്യമാർന്ന സെമിനാറുകളും ചർച്ചകളും:
ആഘോഷങ്ങളുടെ ഭാഗമായി എല്ലാ ദിവസവും രാത്രി 8 മണി മുതൽ പ്രമുഖർ നയിക്കുന്ന വിജ്ഞാനപ്രദമായ സെഷനുകൾ നടക്കും:
* ആരോഗ്യം: ദന്താരോഗ്യം (ഡോ. പ്രജ്ഞ നിമഡെ), ആർത്തവവിരാമവും സ്ത്രീകളുടെ ആരോഗ്യവും (ഡോ. അഞ്ജന ദേവദാസ്), ആയുർവേദവും ഭക്ഷണക്രമവും (ഡോ. നന്ദിനി ഹരി കുറുപ്പ്) എന്നീ വിഷയങ്ങളിൽ വിദഗ്ധർ സംസാരിക്കും.
* അവബോധം: കേരള പോലീസിലെ സൈബർ വിഭാഗം ഉദ്യോഗസ്ഥൻ അരുൺ ആർ നയിക്കുന്ന സൈബർ സുരക്ഷാ സെമിനാർ, കുടുംബശ്രീയുടെ പ്രാധാന്യത്തെക്കുറിച്ച് കേരളാ സർക്കാർ ഡെപ്യൂട്ടി സെക്രട്ടറി ഹേമലത സി.കെ നടത്തുന്ന സെഷൻ എന്നിവ പ്രധാന ആകർഷണങ്ങളാണ്.
* കലയും സമൂഹവും: പ്രമുഖ സിനിമാ-നാടക പ്രവർത്തക ആശാദേവി, ഫ്ലെയിം യൂണിവേഴ്‌സിറ്റിയിലെ ഡോ. ദിവ്യ ബാലൻ എന്നിവർ യഥാക്രമം കലയുടെ പ്രാധാന്യത്തെയും പ്രവാസി സ്ത്രീകളുടെ സാമൂഹിക ഇടങ്ങളെയും കുറിച്ച് സംസാരിക്കും.
മത്സരങ്ങളും കലാപരിപാടികളും:
മാർച്ച് 8-ന് മഹാരാഷ്ട്രയിലെ 36 ജില്ലകളിൽ നിന്നുള്ള സ്ത്രീകളുടെയും കുട്ടികളുടെയും വിവിധ കലാപരിപാടികൾ വാട്സാപ്പ് ഗ്രൂപ്പുകൾ വഴി അരങ്ങേറും. കൂടാതെ ‘വേസ്റ്റ് മെറ്റീരിയലുകളിൽ’ നിന്ന് ഉപയോഗപ്രദമായ വസ്തുക്കൾ നിർമ്മിക്കുന്ന മത്സരവും (Best Out of Waste) സംഘടിപ്പിച്ചിട്ടുണ്ട്.
മഹാസംഗമവും ആദരിക്കലും (സമാപനം):
മാർച്ച് 10-ന് ചൊവ്വാഴ്ച രാത്രി 8 മണിക്ക് നടക്കുന്ന സമാപന സമ്മേളനം ഫെയ്മ നാഷണൽ പ്രസിഡന്റ് എം.പി. പുരുഷോത്തമൻ ഉദ്ഘാടനം ചെയ്യും. പ്രശസ്ത സിനിമാ താരം അഞ്ജലി നായർ, നോർക്ക റൂട്ട്സ് ഉദ്യോഗസ്ഥരായ രമണി കെ, റീസ രഞ്ജിത്ത് എന്നിവർ മുഖ്യാതിഥികളായി പങ്കെടുക്കും. വിവിധ മേഖലകളിൽ മികച്ച നേട്ടങ്ങൾ കൈവരിച്ച മഹാരാഷ്ട്രയിലെ വനിതകളെ ചടങ്ങിൽ ആദരിക്കുകയും മത്സരവിജയികളെ പ്രഖ്യാപിക്കുകയും ചെയ്യും.
ഫെയ്മ മഹാരാഷ്ട്ര പ്രസിഡന്റ് ജയപ്രകാശ് നായർ, ജനറൽ സെക്രട്ടറി പി.പി അശോകൻ, വൈസ് പ്രസിഡന്റ് ടി.ജി സുരേഷ് കുമാർ തുടങ്ങിയവർ ഈ പത്തുദിവസത്തെ പരിപാടികളിയിൽ പങ്കെടുക്കുന്നതാണ്. മഹാരാഷ്ട്രയിലെ മലയാളി വനിതകളുടെ ഏറ്റവും വലിയ കൂട്ടായ്മയിലേക്ക് എല്ലാ കുടുംബങ്ങളെയും ക്ഷണിക്കുന്നതായി സംഘാടകർ അറിയിച്ചു.
കൂടുതൽ വിവരങ്ങൾക്കും നാമനിർദ്ദേശങ്ങൾക്കും:
വിനീത പിള്ള (ചെയർപേഴ്സൺ): 97300 25020
ബോബി സുലക്ഷണ (കൺവീനർ): 99302 85578