കാഞ്ഞങ്ങാട് :വിദ്യാഭ്യാസ-ആരോഗ്യ- തൊഴിൽ മേഖലക്ക് മുൻഗണന
നൽകി ഈവർഷത്തെ സാമൂഹ്യ ഐക്യദാർഢ്യ പക്ഷാചരണം പട്ടികജാതി,പട്ടികവർഗ്ഗ വികസന വകുപ്പിന്റെ നേതൃത്വത്തിൽ ഒക്ടോബർ രണ്ട് മുതൽ 15 വരെ നടത്തും.
പക്ഷാചരണത്തിൻ്റെ സംസ്ഥാനതല ഉദ്ഘാടനം വ്യാഴാഴ്ച പകൽ 12 ന് കാഞ്ഞങ്ങാട് ദുർഗ ഹയർ സെക്കണ്ടറി സ്കൂൾ ഗ്രൗണ്ടിൽ മുഖ്യമന്ത്രി പിണറായി വിജയൻ നിർവ്വഹിക്കും. പട്ടികജാതി, പട്ടികവർഗ്ഗ വികസന, പിന്നോക്കക്ഷേമ
വകുപ്പ് മന്ത്രി ഒ ആർ കേളു അധ്യക്ഷത വഹിക്കും. ഡിസംബർ 31നകം 500 പേർക്ക് തൊഴിൽ ഉറപ്പാക്കുന്ന വിജ്ഞാനകേരളം ആക്ഷൻ പ്ലാൻ പ്രഖ്യാപനം മുഖ്യമന്ത്രി നിർവഹിക്കും. ട്രൈബൽ പ്ലസ് പദ്ധതിയിലൂടെ കൂടുതൽ തൊഴിൽ ഉറപ്പാക്കിയ പഞ്ചായത്തുകൾക്ക് ഗോത്ര സമൃദ്ധി പുരസ്കാര വിതരണവും എല്ലാ പട്ടിക വർഗ്ഗ വിഭാഗങ്ങൾക്കും അടിസ്ഥാന രേഖകൾ ലഭ്യമാക്കി ഡിജിറ്റലൈസ് ചെയ്ത് സൂക്ഷിക്കുന്ന എ ബി സി ഡി പദ്ധതിയുടെ ജില്ലാതല പൂർത്തീകരണ പ്രഖ്യാപനവും മുഖ്യമന്ത്രി നിർവഹിക്കും.
വനം, വന്യജീവി വകുപ്പ് മന്ത്രി എ കെ ശശീന്ദ്രൻ മുഖ്യാതിഥിയാകും.
ഇ. ചന്ദ്രശേഖരൻ എം എൽ എ സ്വാഗതവും ജില്ലാ കലക്ടർ കെ. ഇമ്പശേഖർ ഐഎഎസ് നന്ദിയും പറയും.
വകുപ്പ് സെക്രട്ടറി ഡോക്ടർ എ കൗശികൻ ഐഎഎസ് റിപ്പോർട്ട് അവതരിപ്പിക്കും.
രാജ്മോഹൻ ഉണ്ണിത്താൻ എംപി, എംഎൽഎ മാരായ എം രാജഗോപാലൻ, അഡ്വ. സി എച്ച് കുഞ്ഞമ്പു, എൻ. എ നെല്ലിക്കുന്ന്, എ. കെ എം അഷ്റഫ്, ജില്ല പഞ്ചായത്ത് പ്രസിഡന്റ്‌ ബേബി ബാലകൃഷ്ണൻ, ബ്ലോക്ക്‌ പഞ്ചായത്ത് അസോസിയേഷൻ സംസ്ഥാന വൈസ് പ്രസിഡന്റ്‌ സിജി മാത്യു, ഗ്രാമ പഞ്ചായത്ത് അസോസിയേഷൻ ജില്ലാപ്രസിഡന്റ് സുബ്ബണ്ണ ആൾവ, പട്ടിക ജാതിവികസന വകുപ്പ് ഡയറക്ടർ ഡി ധർമ്മശ്രീ ഐ എ എസ്, പട്ടിക വർഗ വികസന വകുപ്പ് ഡയറക്ടർ ഡോ. മിഥുൻ പ്രേംരാജ് ഐ എ എസ്, പിന്നോക്ക ക്ഷേമ വകുപ്പ് ഡയറക്ടർ മിശാൽ സാഗർ ഐ എ എസ്, കിർട്ടാഡ്സ് ഡയറക്ടർ ബിന്ദു എസ്, പട്ടിക വർഗ സംസ്ഥാന ഉപദേശക സമിതി അംഗങ്ങളായ എം കുമാരൻ, എം സി മാധവൻ എന്നിവർ ആശംസ നേരും.
ഉദ്ഘാടന സമ്മേളന വിജയത്തിന് സ്വാഗത സംഘത്തിന്റെയും വിവിധ വകുപ്പുകളുടെയും നേതൃത്വത്തിൽ വിപുലമായ ഒരുക്കങ്ങളാണ് നടത്തിയത്.
വിവിധ വകുപ്പുകളുമായി ചേർന്ന് പട്ടിക വിഭാഗ – പിന്നാക്ക വികസന വകുപ്പാണ് പരിപാടികൾ സംഘടിപ്പിക്കുന്നത്.
കുതിച്ചുയരാം അറിവിലേക്കും തൊഴിലിലേക്കും എന്നതാണ് ഈ വർഷത്തെ ഐകൃദ്യാർഢ്യ സന്ദേശം.
മഹാത്മ ഗാന്ധി – ശ്രീ നാരായണഗുരു സമാഗമത്തിൻ്റെ നൂറാം വാർഷിക അനുസ്മരണവും ഇത്തവണത്തെ ഐക്യദാർഢ്യ പക്ഷാചരണ ഭാഗമായി നടക്കും. സമാപനം 15 ന് തിരുവനന്തപുരം ആര്യനാട് നടത്തും.
ഓരോ നിയോജക മണ്ഡലത്തിലും
പഞ്ചായത്തുകളിലും പരിപാടികൾ സംഘടിപ്പിക്കും. രണ്ടാഴ്ചത്തെ ഓരോ ദിവസവും പ്രത്യേക വിഷയത്തെ അധികരിച്ചുള്ള പ്രവർത്തനങ്ങളാണ് സംഘടിപ്പിക്കുക.
ഒക്ടോബർ രണ്ടിന് ശുചിത്വം, മൂന്നിന് ലഹരി വിരുദ്ധ പ്രചാരണങ്ങൾ,നാലിന് ആരോഗ്യം, അഞ്ചിന് വിദ്യാഭ്യാസം, ആറിന് ആവാസ ദിനം, എഴിനു തൊഴിൽ കാമ്പയിൻ, എട്ടിന് തൊഴിലുറപ്പ്, ഒൻപതിന് ഗാന്ധി – ശ്രീനാരായണഗുരു സമാഗമത്തിൻ്റെ നൂറാം വാർഷികം, 10 ന് വനാവകാശം, 11 ന് അതിക്രമം തടയൽ, 12 ന് ഐശ്വര്യ ഗ്രാമവികസന പദ്ധതി ആരംഭം, 13 ന് ദുരന്ത സാധ്യതാ വിഷയങ്ങൾ, 14 ന് ഹോസ്റ്റലുകളിലെ സോഷ്യൽ ഓഡിറ്റ് എന്നിങ്ങനെയാണ് വിഷയങ്ങൾ.
15,000 സേഫ് വീടുകൾ പൂർത്തിയായതിൻ്റെ പ്രഖ്യാപനം, 5000 പട്ടിക വിഭാഗക്കാർക്ക് തൊഴിലവസരങ്ങൾ ഉറപ്പിക്കൽ, ജീവിതശൈലി രോഗ നിർണയ ക്യാമ്പുകൾ, ചെറുകിട സംരംഭകർക്കുള്ള ടോപ് അപ്പ് ലോൺ സമൃദ്ധി കേരളം പദ്ധതിയുടെ വായ്പാ വിതരണം തുടങ്ങി വിവിധ പ്രവർത്തനങ്ങളും ഇതോടൊപ്പം നടത്തും.
സംസ്ഥാനതല ഉദ്ഘാടനത്തിനുള്ള എല്ലാ ഒരുക്കങ്ങളും പൂർത്തിയായതായി സംഘാടകസമിതി അറിയിച്ചു
ജില്ലയിലെ വിവിധ നഗറുകളിൽ നിന്നും ഉന്നതികളിൽ നിന്നുമായി രണ്ടായിരത്തിലേറെ യാളുകളും സമൂഹത്തിൽ നാനാ തുറകളിൽ നിന്നുള്ളവരും പരിപാടിയിൽ പങ്കാളികളാകും വാർത്താസമ്മേളനത്തിൽ കാഞ്ഞങ്ങാട് നഗരസഭ ചെയർപേഴ്സൺ കെ വി സുജാത ടീച്ചർ ആർ ഡി ഓ ബിനു ജോസഫ് ജില്ലാ പട്ടിക വർഗ്ഗ വികസന ഓഫീസർ ബി സി അയ്യപ്പൻ അസിസ്റ്റൻറ് പട്ടികവർഗ്ഗ വികസന ഓഫീസർ കെ വി രാഘവൻ അസിസ്റ്റൻറ് പട്ടികജാതി വികസന ഓഫീസർ പി മിനി മഞ്ചേശ്വരം പട്ടികജാതി വികസന ഓഫീസർ തിരുമലേഷ് ജില്ലാ ഇൻഫർമേഷൻ ഓഫീസർ എം മധുസൂദനൻ പങ്കെടുത്തു
