കൊട്ടാരക്കര:കേരള സംസ്ഥാന ചലച്ചിത്ര അക്കാദമി 2025 മെയ് 23 മുതല്‍ 25 വരെ കൊട്ടാരക്കരയില്‍ സംഘടിപ്പിക്കുന്ന ആറാമത് അന്താരാഷ്ട്ര വനിതാ ചലച്ചിത്രമേളയ്ക്ക് മെയ് 23ന് തിരശ്ശീല ഉയരും. മിനര്‍വ തിയേറ്ററിലെ സ്‌ക്രീന്‍ നമ്പര്‍ ഒന്നില്‍ വെള്ളിയാഴ്ച വൈകിട്ട് 5.30ന് ധനകാര്യവകുപ്പ് മന്ത്രി കെ.എന്‍ ബാലഗോപാല്‍ ഉദ്ഘാടനം നിര്‍വഹിക്കും. പിന്നണി ഗാനരംഗത്ത് അന്‍പത് വര്‍ഷം പൂര്‍ത്തിയാക്കിയ പ്രമുഖ ഗായിക ലതികയെ മന്ത്രി ബാലഗോപാല്‍ ചടങ്ങില്‍ ആദരിക്കും.
കൊട്ടാരക്കര നഗരസഭാ ചെയര്‍മാന്‍ അഡ്വ.കെ ഉണ്ണിക്കൃഷ്ണ മേനോന്‍ അധ്യക്ഷത വഹിക്കുന്ന ചടങ്ങില്‍ ചലച്ചിത്ര അക്കാദമി ചെയര്‍മാന്‍ പ്രേംകുമാര്‍, സാംസ്കാരിക വകുപ്പ് ഡയറക്ടര്‍ ഡോ.ദിവ്യ എസ് അയ്യര്‍ ഐ.എ.എസ്, സാംസ്കാരിക പ്രവര്‍ത്തക ക്ഷേമനിധി ബോര്‍ഡ് ചെയര്‍മാന്‍ മധുപാല്‍, ചലച്ചിത്ര അക്കാദമി ജനറല്‍ കൗണ്‍സില്‍ അംഗം കുക്കു പരമേശ്വരന്‍, ചലച്ചിത്രതാരം ആര്‍ഷ ചാന്ദ്‌നി ബൈജു, സംവിധായികമാരായ വിധു വിന്‍സെന്റ്, ശോഭന പടിഞ്ഞാറ്റില്‍, ശിവരഞ്ജിനി, ചലച്ചിത്ര നിര്‍മ്മാതാവും സാംസ്കാരിക പ്രവര്‍ത്തക ക്ഷേമനിധി ബോര്‍ഡ് ഡയറക്ടറുമായ അനില്‍ അമ്പലക്കര, സംഘാടക സമിതി കണ്‍വീനര്‍ സി. അജോയ്, കേരള സംസ്ഥാന യുവജനക്ഷേമ ബോര്‍ഡ് യുവതി ജില്ലാ കോ ഓര്‍ഡിനേറ്റര്‍ മീര എസ് മോഹന്‍, ഫെസ്റ്റിവല്‍ കോ ഓര്‍ഡിനേറ്ററും കില ഡയറക്ടറുമായ വി.സുദേശന്‍ തുടങ്ങിയവര്‍ പങ്കെടുക്കും.
ഉദ്ഘാടനച്ചടങ്ങിനുശേഷം കാന്‍ ചലച്ചിത്രമേളയില്‍ ഗ്രാന്റ് പ്രി പുരസ്‌കാരം ലഭിച്ച പായല്‍ കപാഡിയയുടെ ‘ഓള്‍ വി ഇമാജിന്‍ ഏസ് ലൈറ്റ്’ പ്രദര്‍ശിപ്പിക്കും. മുംബൈയില്‍ ജോലി ചെയ്യുന്ന രണ്ട് മലയാളി നഴ്‌സുമാരുടെ വൈകാരികപ്രശ്‌നങ്ങള്‍ അവതരിപ്പിക്കുന്ന ഈ സിനിമയില്‍ കനി കുസൃതി, ദിവ്യപ്രഭ, ഹൃദു ഹാറൂണ്‍, അസീസ് നെടുമങ്ങാട് എന്നീ മലയാളി താരങ്ങള്‍ വേഷമിടുന്നു. 115 മിനിറ്റ് ആണ് ചിത്രത്തിന്റെ ദൈര്‍ഘ്യം.
കൊട്ടാരക്കരയുടെ വികസനത്തിന് ഉണര്‍വേകുന്നതിനായി ധനകാര്യ വകുപ്പ് മന്ത്രി കെ.എന്‍ ബാലഗോപാല്‍ ആവിഷ്‌കരിച്ച ‘സമഗ്ര കൊട്ടാരക്കര’ എന്ന പദ്ധതിയുടെ ഭാഗമായാണ് വനിതാ ചലച്ചിത്രമേള നടത്തുന്നത്. മൂന്നു ദിവസങ്ങളിലായി നടക്കുന്ന മേളയില്‍ വനിതാ സംവിധായകരുടെ 24 സിനിമകള്‍ പ്രദര്‍ശിപ്പിക്കും.
