കരുനാഗപ്പള്ളി:വീടുകള്‍ കുത്തിത്തുറന്ന് മോഷണം നടത്തുന്ന അന്തര്‍ സംസ്ഥാന മോഷ്ടാവ് പിടിയില്‍. തമിഴ്‌നാട് മധുരൈ മുനിയാണ്ടിപുരം ബാലന്‍ മകന്‍ വടിവേലു 45 ആണ് കരുനാഗപ്പള്ളി പോലീസിന്റെ പിടിയിലായത്. 2024 മാര്‍ച്ച് മാസം പാവുമ്പയിലെ വീടിന്റെ അടുക്കള വാതില്‍ പൊളിച്ച് അകത്തുകയറി 6 പവനോളം സ്വര്‍ണവും 15,000 രൂപയും മോഷണം പോയിരുന്നു. സംഭവത്തില്‍ കേസെടുത്തു അന്വേഷണം ആരംഭിച്ച പോലീസിന് സ്ഥലത്തുനിന്നും ലഭിച്ച വിരല്‍ അടയാളമാണ് കേസിലെ തുമ്പായത്. ലഭിച്ച വിരലടയാളം ശാസ്ത്രീയമായി പരിശോധിച്ചതില്‍ തമിഴ്‌നാട് സ്വദേശി വടിവേലുവിന്റെ താണെന്ന് തിരിച്ചറിഞ്ഞു. തമിഴ്‌നാട് മധുരയില്‍ എത്തിയ പോലീസ് സംഘത്തിന് കുപ്രസിദ്ധമായ തിരുട്ട് ഗ്രാമത്തില്‍ നിന്നും പ്രതിയെ പിടികൂടല്‍ ദുസ്സഹമായിരുന്നു. ദിവസങ്ങളോളം അവിടെ തങ്ങിയ പോലീസ് അതിസാഹസികമായാണ് പ്രതിയെ പിടികൂടിയത്. പിടികൂടിയ വടിവേലുവിന് തമിഴ്‌നാട്ടില്‍ മാത്രം 25 ഓളം മോഷണ കേസുകള്‍ ഉണ്ട്. തമിഴ്‌നാട്ടില്‍ നിന്നും കേരളത്തിലേക്ക് വരുന്ന ലോറികളില്‍ ജോലിക്കായി വന്നു മോഷണം നടത്തി തിരിച്ച് അതേ ലോറിയില്‍ തിരികെ പോകുന്നതാണ് ഇയാളുടെ മോഷണ രീതി. കൊല്ലം ജില്ലാ പോലീസ് മേധാവി കിരണ്‍ നാരായണന്‍ ഐപിഎസിന്റെ നിര്‍ദ്ദേശത്താല്‍ കരുനാഗപ്പള്ളി എസിപി പ്രദീപ്കുമാര്‍ വിഎസിന്റെ മേല്‍നോട്ടത്തില്‍ കരുനാഗപ്പള്ളി പോലീസ് സ്റ്റേഷന്‍ ഇന്‍സ്‌പെക്ടര്‍ അനൂപ്, എസ്‌ഐമാരായ ഷമീര്‍, ആഷിഖ്, അമല്‍ പ്രസാദ് എസ് സി പി ഓ ഹാഷിം, സരണ്‍തോമസ് എന്നിവരടങ്ങിയ പോലീസ് സംഘമാണ് പ്രതിയെ പിടികൂടിയത്. കേരളത്തിലെ പല ഭാഗങ്ങളില്‍ നിന്നും പ്രതി ഇത്തരത്തില്‍ മോഷണം നടത്തിയതായി കണ്ടെത്താന്‍ കഴിഞ്ഞിട്ടുണ്ട് കൂടുതല്‍ അന്വേഷണം നടക്കുകയാണെന്ന് കരുനാഗപ്പള്ളി പോലീസ് അറിയിച്ചു.
വീടുകള്‍ കുത്തിത്തുറന്ന് മോഷണം നടത്തുന്ന അന്തര്‍ സംസ്ഥാന മോഷ്ടാവ് പിടിയില്‍
