കേരളത്തിലെ തൊഴിൽ മേഖലയിൽ ആശങ്ക; കൂട്ടപ്പലായനം ഉണ്ടാകുമോ?

കൊൽക്കത്ത: കേരളം ഉൾപ്പെടെയുള്ള സംസ്ഥാനങ്ങളിൽ ജോലി ചെയ്യുന്ന ബംഗാൾ സ്വദേശികളായ തൊഴിലാളികളെ സ്വന്തം നാട്ടിലേക്ക് മടങ്ങാൻ ക്ഷണിച്ച് പശ്ചിമ ബംഗാൾ മുഖ്യമന്ത്രി സുവേന്ദു അധികാരി. ബംഗാളിൽ കൂടുതൽ തൊഴിൽ അവസരങ്ങളും ക്ഷേമപദ്ധതികളും നടപ്പാക്കുമെന്ന ഉറപ്പോടെയാണ് മുഖ്യമന്ത്രിയുടെ ആഹ്വാനം. പ്രഖ്യാപനങ്ങൾ പ്രാവർത്തികമായാൽ കേരളത്തിലെ വിവിധ തൊഴിൽ മേഖലകളെ ആശ്രയിക്കുന്ന ഇതര സംസ്ഥാന തൊഴിലാളികളുടെ എണ്ണത്തിൽ കുറവുണ്ടാകുമോയെന്ന ചർച്ചയും സജീവമാകുകയാണ്.

തിരിച്ചെത്തുന്നവർക്ക് വർഷത്തിൽ 125 ദിവസത്തെ തൊഴിൽ ഉറപ്പാക്കുമെന്നാണ് മുഖ്യമന്ത്രിയുടെ വാഗ്ദാനം. തൊഴിലുറപ്പ് പദ്ധതിയുടെ പുതിയ രൂപമായ ‘വിബി ജി റാം ജി’ പ്രകാരം 34,500 രൂപയുടെ വാർഷിക വരുമാനവും ഉറപ്പാക്കുമെന്ന് അദ്ദേഹം വ്യക്തമാക്കിയിട്ടുണ്ട്. മുൻ സർക്കാരിന്റെ കാലത്ത് പ്രധാനമന്ത്രി ആവാസ് യോജനയിൽ വീട് ലഭിക്കാതെ പോയ 47 ലക്ഷം പേർക്ക് രണ്ടുവർഷത്തിനുള്ളിൽ വീട് നിർമിച്ചുനൽകുമെന്നും പഞ്ചായത്ത് മന്ത്രി ദിലീപ് ഘോഷ് പ്രഖ്യാപിച്ചു.

ബിജെപി സർക്കാർ അധികാരത്തിലെത്തിയതോടെ ബംഗാളിൽ വ്യവസായ വികസനത്തിന് പുതിയ വേഗം കൈവരിക്കുമെന്നും മുഖ്യമന്ത്രി അവകാശപ്പെടുന്നു. പ്രമുഖ കമ്പനികൾ സംസ്ഥാനത്ത് നിക്ഷേപം നടത്തുകയും പുതിയ പ്ലാന്റുകൾ സ്ഥാപിക്കുകയും ചെയ്യുന്നുണ്ട്. അടച്ചുപൂട്ടിയ തേയിലത്തോട്ടങ്ങളിൽ ഭൂരിഭാഗവും വീണ്ടും പ്രവർത്തനസജ്ജമാക്കുമെന്നും കൂടുതൽ തൊഴിലവസരങ്ങൾ സൃഷ്ടിക്കുമെന്നും സർക്കാർ വ്യക്തമാക്കുന്നു.

നാട്ടിലേക്ക് മടങ്ങുന്ന തൊഴിലാളികൾക്ക് തൊഴിൽ കാർഡ് നൽകും. കേന്ദ്രത്തിന്റെ സൗജന്യ റേഷൻ പദ്ധതിക്കു പുറമേ, ആയുഷ്മാൻ ഭാരത് പദ്ധതിയിൽ ഉൾപ്പെടാത്തവർക്ക് സംസ്ഥാന ആരോഗ്യ ഇൻഷുറൻസ് പദ്ധതിയുടെ ആനുകൂല്യവും ലഭ്യമാക്കും. തൊഴിൽ, ഭക്ഷ്യസുരക്ഷ, വീട്, ആരോഗ്യപരിരക്ഷ എന്നിവ ഒരുമിച്ച് ഉറപ്പാക്കി തൊഴിലാളികളെ തിരിച്ചെത്തിക്കുകയാണ് സർക്കാരിന്റെ ലക്ഷ്യം.

കേരളത്തിന് തിരിച്ചടിയാകുമോ മടക്കയാത്ര?

ബംഗാൾ നിയമസഭാ തിരഞ്ഞെടുപ്പിന് മുമ്പ് ഇതര സംസ്ഥാനങ്ങളിൽ ജോലി ചെയ്തിരുന്ന തൊഴിലാളികൾ കൂട്ടത്തോടെ നാട്ടിലേക്ക് മടങ്ങിയത് കേരളത്തിൽ വലിയ പ്രതിസന്ധി സൃഷ്ടിച്ചിരുന്നു. ഹോട്ടലുകൾ, റസ്റ്ററന്റുകൾ, നിർമാണമേഖല, ഫാക്ടറികൾ എന്നിവിടങ്ങളിൽ തൊഴിലാളികളെ കിട്ടാത്ത സാഹചര്യമുണ്ടായി. ജീവനക്കാരുടെ അഭാവത്തിൽ ചില ഹോട്ടലുകൾക്ക് പ്രവർത്തനം താൽക്കാലികമായി അവസാനിപ്പിക്കേണ്ടിയും വന്നു.

കേരളത്തിലെ തൊഴിൽ വിപണിയിൽ ഇതര സംസ്ഥാന തൊഴിലാളികൾക്കുള്ള സ്വാധീനം വളരെ വലുതാണ്. സംസ്ഥാനത്ത് ഏകദേശം ഒരുലക്ഷത്തോളം അംഗീകൃത റസ്റ്ററന്റുകളുണ്ടെന്നാണ് കണക്ക്. ഇവയിൽ 90 ശതമാനത്തിലും ഇതര സംസ്ഥാനങ്ങളിൽ നിന്നുള്ളവരാണ് പ്രധാനമായും ജോലി ചെയ്യുന്നത്.

സംസ്ഥാന ആസൂത്രണ ബോർഡിന്റെ 2024ലെ സാമ്പത്തിക അവലോകന റിപ്പോർട്ട് പ്രകാരം കേരളത്തിൽ 31 ലക്ഷം ഇതര സംസ്ഥാന തൊഴിലാളികളുണ്ട്. ഗുലാത്തി ഇൻസ്റ്റിറ്റ്യൂട്ടിന്റെ കണക്ക് 25 ലക്ഷമാണ്. അനൗദ്യോഗിക കണക്കുകൾ പ്രകാരം ഇത് 40 ലക്ഷത്തിലധികമാണ്. ഇവരിൽ പകുതിയോളം ബംഗാൾ സ്വദേശികളാണെന്നാണ് വിലയിരുത്തൽ. അസം സ്വദേശികളാണ് തൊട്ടുപിന്നിൽ.

കേരളത്തിന്റെ സമ്പദ്‌വ്യവസ്ഥയിലും നിർണായക സാന്നിധ്യം

കേരളത്തിൽനിന്ന് പ്രതിവർഷം ഏകദേശം 60,000 കോടി രൂപയാണ് ഇതര സംസ്ഥാന തൊഴിലാളികൾ സമ്പാദിക്കുന്നതെന്നാണ് കണക്കുകൾ സൂചിപ്പിക്കുന്നത്. ഇതിൽ 20,000 കോടി രൂപയോളം മാത്രമാണ് കേരളത്തിൽ ചെലവഴിക്കുന്നത്. ശേഷിക്കുന്ന 40,000 കോടി രൂപ സ്വന്തം സംസ്ഥാനങ്ങളിലേക്ക് അയയ്ക്കുന്നു.

തൊഴിൽ മേഖലയിൽ മാത്രമല്ല, കേരളത്തിന്റെ പ്രാദേശിക വിപണിയിലും ഇവരുടെ സാന്നിധ്യം നിർണായകമാണ്. മലയാളികളുടെ വാങ്ങൽശീലങ്ങൾ മാളുകളിലേക്കും സൂപ്പർമാർക്കറ്റുകളിലേക്കും ഓൺലൈൻ വ്യാപാരത്തിലേക്കും മാറിയതോടെ പ്രാദേശിക വിപണികളിൽ ഇതര സംസ്ഥാന തൊഴിലാളികളുടെ പങ്ക് വർധിച്ചിട്ടുണ്ട്. ഇവരുടെ കൂട്ടത്തോടെയുള്ള മടക്കയാത്രയെത്തുടർന്ന് ബീഫ് വിപണിയിൽ ഉണ്ടായ ഇടിവ് ഇതിന്റെ ഉദാഹരണമായി ചൂണ്ടിക്കാണിക്കപ്പെടുന്നു.

കേരളത്തിലെ വേതനമാണ് പ്രധാന ആകർഷണം

ബംഗാൾ സ്വദേശികളെ കേരളത്തിലേക്ക് ആകർഷിക്കുന്ന പ്രധാന ഘടകം ഉയർന്ന ദിവസവേതനമാണ്. മറ്റ് സംസ്ഥാനങ്ങളെ അപേക്ഷിച്ച് കേരളത്തിലെ കൂലി നിരക്കിൽ വലിയ വ്യത്യാസമുണ്ട്.

2018 ഡിസംബറിലെ കണക്കനുസരിച്ച് ഗ്രാമീണ കാർഷിക മേഖലയിൽ പുരുഷ തൊഴിലാളികളുടെ ദേശീയ ശരാശരി ദിവസവേതനം 321 രൂപയായിരുന്നു. കേരളത്തിൽ ഇത് 767 രൂപയായിരുന്നു. 2024-25ൽ ദേശീയ ശരാശരി 398 രൂപയായപ്പോൾ കേരളത്തിലേത് 869 രൂപയായി ഉയർന്നു.

അതേസമയം, ബംഗാളിൽ 2018ൽ 329 രൂപയായിരുന്ന ദിവസവേതനം 2024-25ൽ 452 രൂപയായി മാത്രമാണ് ഉയർന്നത്. ഇതേ കാലയളവിൽ ത്രിപുരയിൽ 370 രൂപയും ഒഡീഷയിൽ 369 രൂപയും ഉത്തർപ്രദേശിൽ 355 രൂപയും ഗുജറാത്തിൽ 358 രൂപയുമാണ് ശരാശരി ദിവസവേതനം.

ഈ കണക്കുകൾ പ്രകാരം കേരളത്തിലെ വേതനവും ബംഗാളിലെ വേതനവും തമ്മിൽ വലിയ അന്തരമുണ്ട്. അതിനാൽ ഉയർന്ന വരുമാനം ലഭിക്കുന്ന കേരളം വിട്ട് തൊഴിലാളികൾ കൂട്ടത്തോടെ മടങ്ങാനുള്ള സാധ്യത കുറവാണെന്നാണ് വിലയിരുത്തൽ. എന്നാൽ സ്വന്തം നാട്ടിൽ തൊഴിലും വീടും ആരോഗ്യ ഇൻഷുറൻസും ഭക്ഷ്യസുരക്ഷയും ഉറപ്പാകുമെന്ന വാഗ്ദാനം ചിലരെ ആകർഷിച്ചേക്കാം.

തൊഴിലാളികളെ കിട്ടാൻ കേരളം ഇപ്പോഴേ ബുദ്ധിമുട്ടുന്നു

കേരളത്തിലെ പല മേഖലകളിലും ഇപ്പോൾത്തന്നെ ആവശ്യത്തിന് തൊഴിലാളികളെ ലഭിക്കുന്നില്ല. ബംഗാൾ സ്വദേശികൾ വലിയ തോതിൽ മടങ്ങിയാൽ ഹോട്ടൽ, റസ്റ്ററന്റ്, നിർമാണ മേഖലകളിലാകും പ്രതിസന്ധി കൂടുതൽ പ്രകടമാകുക.

റസ്റ്ററന്റുകളിൽ അവിദഗ്ധ തൊഴിലാളികൾക്ക് ദിവസം 500 രൂപ മുതൽ വേതനം ലഭിക്കുന്നുണ്ട്. വിദഗ്ധ തൊഴിലാളികൾക്ക് 1,500 മുതൽ 2,000 രൂപ വരെയാണ് ദിവസക്കൂലി. ഭക്ഷണവും താമസവും ഉൾപ്പെടെയുള്ള സൗകര്യങ്ങൾ ഇതിനു പുറമേയാണ് ലഭിക്കുന്നത്.

താരതമ്യേന ഉയർന്ന വരുമാനത്തിനൊപ്പം മെച്ചപ്പെട്ട ജീവിതസാഹചര്യവും കേരളത്തിൽ ലഭിക്കുന്നുണ്ട്. സുരക്ഷിതത്വം, സ്വതന്ത്രമായ ജീവിതസാഹചര്യം, ക്ഷേമപദ്ധതികളുടെ ആനുകൂല്യങ്ങൾ എന്നിവയും തൊഴിലാളികളെ ഇവിടെ തുടരാൻ പ്രേരിപ്പിക്കുന്ന ഘടകങ്ങളാണ്. ഇവിടെനിന്ന് ലഭിക്കുന്ന വരുമാനത്തിന്റെ നല്ലൊരു ഭാഗം സമ്പാദ്യമായി മാറ്റാൻ കഴിയുന്നതും കേരളത്തിന്റെ ആകർഷണം വർധിപ്പിക്കുന്നു.

മറ്റ് സംസ്ഥാനങ്ങളും തൊഴിൽകേന്ദ്രങ്ങളാകുന്നു

ബംഗാളിൽനിന്നുള്ള തൊഴിലാളികൾ കൂട്ടത്തോടെ കേരളം വിടുമെന്ന് ഇപ്പോൾ കരുതുന്നില്ലെങ്കിലും സാഹചര്യം മാറിക്കൊണ്ടിരിക്കുകയാണെന്ന മുന്നറിയിപ്പാണ് സാമ്പത്തിക വിദഗ്ധർ നൽകുന്നത്. മറ്റ് സംസ്ഥാനങ്ങളിലും വികസനവും തൊഴിൽസാധ്യതകളും വർധിക്കുന്ന സാഹചര്യത്തിൽ കേരളത്തിലേക്കുള്ള തൊഴിലാളികളുടെ ഒഴുക്ക് ഭാവിയിൽ കുറയാം.

കേരളത്തിലെ ഇതര സംസ്ഥാന തൊഴിലാളികളിൽ ഇപ്പോൾ അസം, ഒഡീഷ, ഉത്തർപ്രദേശ്, വടക്കുകിഴക്കൻ സംസ്ഥാനങ്ങൾ എന്നിവിടങ്ങളിൽ നിന്നുള്ളവരുടെ എണ്ണവും ഗണ്യമാണ്. അതിനാൽ ബംഗാൾ സ്വദേശികളുടെ മടക്കയാത്ര മാത്രമല്ല, മറ്റ് സംസ്ഥാനങ്ങളിലെ തൊഴിൽസാധ്യതകളിലെ മാറ്റങ്ങളും കേരളം ശ്രദ്ധിക്കേണ്ടതുണ്ട്.

ഇതര സംസ്ഥാന തൊഴിലാളികളെ വലിയ തോതിൽ ആശ്രയിച്ചാണ് കേരളത്തിലെ പല മേഖലകളും മുന്നോട്ടുപോകുന്നത്. സ്വന്തം നാട്ടിൽ മെച്ചപ്പെട്ട തൊഴിലും ജീവിതസൗകര്യങ്ങളും ലഭിച്ചാൽ ഇവർ മടങ്ങിപ്പോകാനുള്ള സാധ്യതയുണ്ട്. അത്തരമൊരു സാഹചര്യം മുൻകൂട്ടി കണ്ട് തൊഴിലാളിക്ഷാമം നേരിടാനുള്ള ബദൽ സംവിധാനങ്ങൾ കേരളം ഇപ്പോഴേ ആസൂത്രണം ചെയ്യേണ്ടതുണ്ട്.