വാഷിങ്ടൺ: കേരളത്തിന്റെ വേരുകളുള്ള നിത്യ രാമന് അമേരിക്കൻ രാഷ്ട്രീയത്തിൽ ചരിത്രനേട്ടം. ലോസ് ആഞ്ജലീസ് നഗരത്തിന്റെ ആദ്യ ഏഷ്യൻ-അമേരിക്കൻ മേയറായി നിത്യ തിരഞ്ഞെടുക്കപ്പെട്ടു. നിലവിലെ മേയർ കരേൻ ബാസിനെ പരാജയപ്പെടുത്തിയാണ് 45-കാരിയായ നിത്യയുടെ വിജയം. ഡിസിഷൻ ഡെസ്ക് എച്ച്.ക്യു പുറത്തുവിട്ട കണക്കുകൾ പ്രകാരം നിത്യയ്ക്ക് 51.1 ശതമാനം വോട്ടുകൾ ലഭിച്ചപ്പോൾ കരേൻ ബാസിന് 48.33 ശതമാനം വോട്ടുകളാണ് നേടാനായത്.
കേരളവുമായി കുടുംബബന്ധം മാത്രമല്ല, ജന്മനാടുമായും നിത്യയ്ക്ക് അടുപ്പമുണ്ട്. അമ്മ സുധ കേച്ചേരി തൃശ്ശൂർ സ്വദേശിനിയും അച്ഛൻ വെങ്കിട്ടരാമൻ തിരുവനന്തപുരം സ്വദേശിയുമാണ്. 1981-ൽ ജനിച്ച നിത്യയുടെ ബാല്യത്തിന്റെ ആദ്യകാലം കേരളത്തിലായിരുന്നു. അച്ഛൻ തിരുവനന്തപുരത്തെ കെൽട്രോണിൽ എൻജിനീയറായി ജോലി ചെയ്യുകയായിരുന്നു. ജനിച്ച് ആദ്യ രണ്ടര വർഷം തിരുവനന്തപുരത്ത് കഴിഞ്ഞ നിത്യ പിന്നീട് തൃശ്ശൂരിലെത്തി.
വെങ്കിട്ടരാമൻ ഉപരിപഠനത്തിനായി അമേരിക്കയിലേക്ക് പോയതോടെയാണ് അമ്മയും മകളും തൃശ്ശൂരിലേക്ക് താമസം മാറിയത്. നടനനികേതനത്തിൽ പ്രവർത്തിച്ചിരുന്ന ഭാരതീയവിദ്യാഭവനിൽ എൽ.കെ.ജി മുതൽ ഒന്നാം ക്ലാസ് വരെ പഠിച്ചു. ആറാം വയസ്സിൽ കുടുംബത്തോടൊപ്പം അമേരിക്കയിലേക്ക് പോയി.
ബിരുദപഠനത്തിനു ശേഷം നാലുവർഷത്തോളം ഇന്ത്യയിൽ ചെലവഴിച്ചതാണ് നിത്യയുടെ ജീവിതത്തിലെ മറ്റൊരു പ്രത്യേക അധ്യായം. നൃത്തത്തോടുള്ള താൽപര്യം കാരണം ചെന്നൈയിലെ കലാക്ഷേത്രയിൽ ചേർന്ന് ഭരതനാട്യം അഭ്യസിച്ചു. 2010-ൽ ഹോളിവുഡ് തിരക്കഥാകൃത്തും നിർമാതാവുമായ വാലി ചന്ദ്രശേഖരനുമായുള്ള വിവാഹവും ഇന്ത്യയിൽവെച്ചായിരുന്നു. ബെംഗളൂരുവിലായിരുന്നു വിവാഹം.
ഇന്ത്യൻ ഓവർസീസ് ബാങ്കിൽ ജോലി ചെയ്തിരുന്ന അമ്മ സുധ കേച്ചേരി തൃശ്ശൂരിലെ വിവിധ ശാഖകളിൽ സേവനമനുഷ്ഠിച്ചിട്ടുണ്ട്. സഹോദരൻ ആകാശ് രാമൻ ന്യൂയോർക്കിൽ ഫിനാൻഷ്യൽ മേഖലയിലാണ് ജോലി ചെയ്യുന്നത്.
ഡെമോക്രാറ്റിക് പാർട്ടി സ്ഥാനാർഥിയായാണ് നിത്യ തിരഞ്ഞെടുപ്പിൽ മത്സരിച്ചത്. അതേ പാർട്ടിയിലെ നേതാവും നിലവിലെ മേയറുമായ കരേൻ ബാസിനെ തന്നെ പരാജയപ്പെടുത്തിയെന്നതും വിജയത്തിന്റെ പ്രത്യേകതയാണ്. കേരളത്തിന്റെ മണ്ണിൽ ബാല്യം ആരംഭിച്ച നിത്യ അമേരിക്കയിലെ പ്രധാന നഗരങ്ങളിലൊന്നിന്റെ ഭരണനേതൃത്വത്തിലേക്ക് എത്തിയത് ശ്രദ്ധേയമായ നേട്ടമായി.
