ചവറ:കുട്ടികളുടെ അഭിരുചികളും കഴിവുകളും കണ്ടെത്തി വളര്‍ത്തിയെടുക്കുന്നതിനായി ചവറയില്‍ നവകൗശല്‍ കേന്ദ്രം ഉടന്‍ ആരംഭിക്കുമെന്ന് മന്ത്രി ഷിബു ബേബി ജോണ്‍ പറഞ്ഞു. പദ്ധതിയുടെ ഉദ്ഘാടനം ജനുവരിയില്‍ നടത്തുന്നതിനുള്ള നടപടികള്‍ പുരോഗമിക്കുകയാണെന്നും മന്ത്രി അറിയിച്ചു. തേവലക്കര സര്‍ക്കാര്‍ എസ് എം വി എല്‍ പി സ്‌കൂളിന്റെ പുതിയ കെട്ടിടം ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി. കുട്ടികളുടെ താത്പര്യങ്ങള്‍ തിരിച്ചറിഞ്ഞ് ആവശ്യമായ മാര്‍ഗനിര്‍ദേശവും പരിശീലനവും നല്‍കുന്നതിലൂടെ അവരുടെ കഴിവുകള്‍ പരിപോഷിപ്പിക്കാന്‍ നവകൗശല്‍ കേന്ദ്രം സഹായകമാകുമെന്ന്
മന്ത്രി പറഞ്ഞു. നിര്‍മിത ബുദ്ധിയുടെ സഹായം അടക്കം ഇതിനായി പ്രയോജനപ്പെടുത്തും എന്നും അദ്ദേഹം കൂട്ടിച്ചേര്‍ത്തു.
ഗ്രാമപഞ്ചായത്ത് പ്രസിഡന്റ് എസ് അനില്‍ അധ്യക്ഷനായ ചടങ്ങില്‍ മുന്‍ എം എല്‍ എ സുജിത്ത് വിജയന്‍ പിള്ള മുഖ്യാതിഥിയായി. പ്രധാനാധ്യാപകന്‍ ടി ബിജു, ചവറ ബ്ലോക്ക് പഞ്ചായത്ത് പ്രസിഡന്റ് ഷംല നൗഷാദ്, പഞ്ചായത്തംഗങ്ങള്‍, അധ്യാപകര്‍, വിദ്യാര്‍ഥികള്‍ തുടങ്ങിയവര്‍ പങ്കെടുത്തു.
ചടങ്ങിന്റെ ഭാഗമായി കുട്ടികളുടെ കലാപരിപാടികളും പൂര്‍വവിദ്യാര്‍ഥികളെ ആദരിക്കലും നടന്നു.
ചവറയില്‍ സമഗ്ര ബഡ്‌സ് പുനരധി
വാസ കേന്ദ്രം ആരംഭിക്കും: മന്ത്രി ഷിബു ബേബി ജോണ്‍
ഭിന്നശേഷിക്കാരായ കുട്ടികളുടെ പുനരധിവാസത്തിനും കുടുംബങ്ങളുടെ സാമ്പത്തിക സ്വയംപര്യാപ്തതയ്ക്കും സഹായകമാകുന്ന സമഗ്ര ബഡ്‌സ് പുനരധിവാസ കേന്ദ്രം ചവറയില്‍ ആരംഭിക്കുമെന്ന് മന്ത്രി ഷിബു ബേബി ജോണ്‍. രണ്ട് ഏക്കറോളം സ്ഥലം കണ്ടെത്തി കേന്ദ്രം സ്ഥാപിക്കാനാണ് ലക്ഷ്യമിടുന്നതെന്നും മന്ത്രി പറഞ്ഞു.
ചവറ ഐ ആര്‍ ഇ എല്‍ (ഇന്ത്യ) ലിമിറ്റഡിന്റെ സാമൂഹിക ഉത്തരവാദിത്ത പദ്ധതിയില്‍ ഉള്‍പ്പെടുത്തി നീണ്ടകര ഹോളിക്രോസ് പ്രതീക്ഷ സ്‌പെഷ്യല്‍ സ്‌കൂളില്‍ നിര്‍മിച്ച ഫിസിക്കല്‍ ആന്‍ഡ് മെന്റല്‍ ഹെല്‍ത്ത് ഡെവലപ്മെന്റ് സെന്റര്‍ ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി. ഭിന്നശേഷിക്കാരായ കുട്ടികള്‍ രക്ഷിതാക്കളുടെ മാത്രം ഉത്തരവാദിത്തമല്ലെന്നും സമൂഹത്തിന്റെ കൂടി ഉത്തരവാദിത്തമാണെന്നും മന്ത്രി പറഞ്ഞു. സമഗ്ര ബഡ്‌സ് പുനരധിവാസ കേന്ദ്രത്തിലൂടെ ഗുണഭോക്താക്കള്‍ക്ക് ആവശ്യമായ പരിശീലനവും പുനരധിവാസ സൗകര്യങ്ങളും ലഭ്യമാക്കുന്നതിനൊപ്പം അവരുടെ മാതാപിതാക്കള്‍ക്കും കുടുംബങ്ങള്‍ക്കും വരുമാനമാര്‍ഗങ്ങള്‍ കണ്ടെത്താന്‍ സഹായിക്കുന്ന പ്രവര്‍ത്തനങ്ങളും നടപ്പാക്കും.
ഐ ആര്‍ ഇ എല്‍ (ഇന്ത്യ) നിര്‍മിച്ചു നല്‍കിയ ഫിസിക്കല്‍ ആന്‍ഡ് മെന്റല്‍ ഹെല്‍ത്ത് ഡെവലപ്മെന്റ് സെന്ററിലൂടെ ഹോളിക്രോസ് പ്രതീക്ഷ സ്‌പെഷ്യല്‍ സ്‌കൂളിലെ കുട്ടികളുടെ ശാരീരികവും മാനസികവുമായ ഉന്നമനം ഉറപ്പാക്കുന്നതിനും ആവശ്യമായ ആരോഗ്യപരിചരണ സൗകര്യങ്ങള്‍ ഒരുക്കുന്നതിനുമാണ് ലക്ഷ്യമിടുന്നത്.
നീണ്ടകര ഗ്രാമപഞ്ചായത്ത് പ്രസിഡന്റ് ബി ശിവലാല്‍ അധ്യക്ഷത വഹിച്ച ഉദ്ഘാടന ചടങ്ങില്‍ ബ്ലോക്ക് പഞ്ചായത്ത് പ്രസിഡന്റ് ഷംല നൗഷാദ് മുഖ്യാതിഥിയായി. ഐ ആര്‍ ഇ എല്‍ ചവറ ജനറല്‍ മാനേജര്‍ ആന്‍ഡ് ഹെഡ് എന്‍ എസ് അജിത്, ഡെപ്യൂട്ടി ജനറല്‍ മാനേജര്‍ കെ എസ് ഭക്തദര്‍ശന്‍, ജില്ലാ പഞ്ചായത്ത് അംഗം ഐ ജയലക്ഷ്മി, സ്‌കൂള്‍ പ്രിന്‍സിപ്പല്‍, അധ്യാപകര്‍, വിദ്യാര്‍ഥികള്‍, പി ടി എ അംഗങ്ങള്‍, രക്ഷിതാക്കള്‍, ജനപ്രതിനിധികള്‍ തുടങ്ങിയവര്‍ പങ്കെടുത്തു. കുട്ടികളുടെ കലാപരിപാടികളും അരങ്ങേറി.
