സൗന്ദര്യം വർധിപ്പിക്കാനും മുടിയുടെ വളർച്ച മെച്ചപ്പെടുത്താനും നല്ല ഉറക്കം ലഭിക്കാനും ശരീരത്തിന് കൂടുതൽ ഊർജം നൽകാനുമൊക്കെ സഹായിക്കുമെന്ന് അവകാശപ്പെടുന്ന ഉൽപ്പന്നങ്ങൾ ഇന്ന് വിപണിയിൽ ധാരാളമാണ്. വിറ്റാമിനുകളും വിവിധതരം ഹെൽത്ത് സപ്ലിമെന്റുകളും ഉൾപ്പെടെയുള്ള ഇത്തരം ഉൽപ്പന്നങ്ങൾക്ക് സോഷ്യൽ മീഡിയയിലും വലിയ പ്രചാരമാണ്. സെലിബ്രിറ്റികളും ഇൻഫ്ലുവൻസർമാരും പങ്കുവയ്ക്കുന്ന സെൽഫ് കെയർ വീഡിയോകളിൽ ഇവയ്ക്ക് പ്രത്യേക സ്ഥാനവുമുണ്ട്.
ഇത്തരം വീഡിയോകൾ കാണുമ്പോൾ നമുക്കും സപ്ലിമെന്റുകൾ ഉപയോഗിച്ചുനോക്കാൻ തോന്നിയേക്കാം. എന്നാൽ മറ്റൊരാൾക്ക് ഗുണം ചെയ്ത ഉൽപ്പന്നം നമുക്കും ആവശ്യമാണെന്ന് കരുതുന്നത് ശരിയല്ല. ശരീരത്തിന്റെ പോഷകാവശ്യങ്ങൾ, ആരോഗ്യസ്ഥിതി, നിലവിൽ കഴിക്കുന്ന മരുന്നുകൾ തുടങ്ങിയവയെല്ലാം പരിഗണിച്ചുവേണം സപ്ലിമെന്റുകൾ തിരഞ്ഞെടുക്കാൻ.
സമീകൃതാഹാരത്തിലൂടെ ആവശ്യമായ പോഷകങ്ങൾ ലഭിക്കുന്നവർക്ക് അധിക സപ്ലിമെന്റുകൾ വേണ്ടിവരണമെന്നില്ല. അതേസമയം, ചില പോഷകങ്ങളുടെ കുറവുള്ളവർക്കും പ്രത്യേക ആരോഗ്യസാഹചര്യങ്ങളിലുള്ളവർക്കും ഇവ പ്രയോജനപ്പെടാം. എന്നാൽ അനാവശ്യമായോ അമിതമായോ ഉപയോഗിച്ചാൽ ആരോഗ്യപ്രശ്നങ്ങളുണ്ടാകാനും സാധ്യതയുണ്ട്. സപ്ലിമെന്റുകൾ വാങ്ങുന്നതിനും ഉപയോഗിക്കുന്നതിനും മുമ്പ് ശ്രദ്ധിക്കേണ്ട പ്രധാന കാര്യങ്ങൾ എന്തൊക്കെയാണെന്ന് നോക്കാം.
1. പരസ്യവാഗ്ദാനങ്ങൾ മാത്രം വിശ്വസിക്കരുത്
മുടികൊഴിച്ചിൽ കുറയ്ക്കും, ചർമത്തിന് തിളക്കം നൽകും, ഉറക്കം മെച്ചപ്പെടുത്തും, ക്ഷീണം അകറ്റും തുടങ്ങിയ അവകാശവാദങ്ങളോടെയാണ് പല സപ്ലിമെന്റുകളും വിപണിയിലെത്തുന്നത്. എന്നാൽ ഇത്തരം ഉൽപ്പന്നങ്ങൾ എല്ലാവരിലും ഒരേ ഫലം നൽകണമെന്നില്ല. ശരീരത്തിലെ പോഷകക്കുറവോ മറ്റ് ആരോഗ്യപ്രശ്നങ്ങളോ പരിഹരിക്കാതെ സപ്ലിമെന്റുകൾ ഉപയോഗിക്കുന്നതുകൊണ്ട് പ്രതീക്ഷിക്കുന്ന ഫലം ലഭിക്കണമെന്നില്ല.
ഏതെങ്കിലും വിറ്റാമിന്റെയോ ധാതുവിന്റെയോ കുറവുണ്ടെന്ന് പരിശോധനയിലൂടെ കണ്ടെത്തിയിട്ടുണ്ടോ, ഡോക്ടർ സപ്ലിമെന്റ് നിർദേശിച്ചിട്ടുണ്ടോ തുടങ്ങിയ കാര്യങ്ങൾ ആദ്യം വിലയിരുത്തണം. സോഷ്യൽ മീഡിയയിലെ പ്രചാരണം കണ്ട് സ്വയം ചികിത്സ ആരംഭിക്കുന്നത് ഒഴിവാക്കുക.
2. കലോറിയും പഞ്ചസാരയും പരിശോധിക്കണം
എല്ലാ സപ്ലിമെന്റുകളും ഗുളികകളുടെ രൂപത്തിലല്ല ലഭിക്കുന്നത്. ഗമ്മികൾ, പാനീയങ്ങൾ, പൊടികൾ, ഹെർബൽ ഉൽപ്പന്നങ്ങൾ തുടങ്ങിയ രൂപങ്ങളിലും ഇവ വിപണിയിലുണ്ട്. രുചി വർധിപ്പിക്കുന്നതിനായി ചില ഉൽപ്പന്നങ്ങളിൽ പഞ്ചസാരയും മറ്റ് ചേരുവകളും ചേർക്കാറുണ്ട്.
അതുകൊണ്ട് ഉൽപ്പന്നം വാങ്ങുന്നതിന് മുമ്പ് അതിലെ കലോറി, പഞ്ചസാര, മറ്റ് ചേരുവകൾ എന്നിവയുടെ അളവ് പരിശോധിക്കണം. ശരീരഭാരം നിയന്ത്രിക്കുന്നവരും ഭക്ഷണക്രമത്തിൽ പ്രത്യേക ശ്രദ്ധ പുലർത്തുന്നവരും ഇക്കാര്യം പ്രത്യേകം ശ്രദ്ധിക്കേണ്ടതാണ്.
3. ചില ആരോഗ്യാവസ്ഥകളുള്ളവർ കൂടുതൽ ശ്രദ്ധിക്കണം
കരൾ, വൃക്ക രോഗങ്ങളുള്ളവർ സപ്ലിമെന്റുകൾ ഉപയോഗിക്കുന്നതിന് മുമ്പ് നിർബന്ധമായും ഡോക്ടറുടെ ഉപദേശം തേടണം. ഗർഭിണികൾ, മുലയൂട്ടുന്ന അമ്മമാർ, അവയവമാറ്റ ശസ്ത്രക്രിയയ്ക്ക് വിധേയരായവർ, കീമോതെറാപ്പി സ്വീകരിക്കുന്നവർ, രക്തം കട്ടപിടിക്കുന്നത് തടയാനുള്ള മരുന്നുകൾ കഴിക്കുന്നവർ എന്നിവരും പ്രത്യേക ജാഗ്രത പാലിക്കണം.
സപ്ലിമെന്റുകളിലെ ചില ഘടകങ്ങൾ നിലവിലുള്ള ആരോഗ്യപ്രശ്നങ്ങളെ സ്വാധീനിക്കുകയോ ചികിത്സയുടെ ഫലത്തെ ബാധിക്കുകയോ ചെയ്തേക്കാം. പ്രകൃതിദത്തമെന്നോ ഹെർബൽ ഉൽപ്പന്നമെന്നോ വിശേഷിപ്പിക്കുന്നതുകൊണ്ടുമാത്രം പാർശ്വഫലങ്ങളില്ലെന്ന് ഉറപ്പിക്കാനാവില്ല.
4. കഴിക്കുന്ന മരുന്നുകളുമായി പ്രശ്നങ്ങളുണ്ടാകുമോ?
പ്രമേഹം, രക്തസമ്മർദം തുടങ്ങിയ രോഗങ്ങൾക്ക് സ്ഥിരമായി മരുന്ന് കഴിക്കുന്നവർ പുതിയ സപ്ലിമെന്റുകൾ തുടങ്ങുന്നതിന് മുമ്പ് ഡോക്ടറുമായി സംസാരിക്കണം. ചില വിറ്റാമിനുകൾ, ധാതുക്കൾ, ഔഷധസസ്യങ്ങളിൽനിന്നുള്ള ഘടകങ്ങൾ എന്നിവ മരുന്നുകളുമായി പ്രതിപ്രവർത്തനം നടത്താൻ സാധ്യതയുണ്ട്.
ഇത് മരുന്നിന്റെ ഫലപ്രാപ്തി കുറയ്ക്കുകയോ പാർശ്വഫലങ്ങൾ വർധിപ്പിക്കുകയോ ചെയ്യാം. ഒന്നിലധികം സപ്ലിമെന്റുകൾ ഒരേസമയം ഉപയോഗിക്കുന്നവരും പ്രത്യേകം ശ്രദ്ധിക്കണം. വ്യത്യസ്ത ഉൽപ്പന്നങ്ങളിലൂടെ ഒരേ പോഷകം അമിതമായി ശരീരത്തിലെത്തുന്ന സാഹചര്യമുണ്ടാകാം.
5. പാക്കറ്റിലെ വിവരങ്ങൾ വായിച്ചശേഷം മാത്രം ഉപയോഗിക്കുക
സപ്ലിമെന്റുകൾ വാങ്ങുമ്പോൾ പാക്കറ്റിലെ ലേബൽ അവഗണിക്കരുത്. അതിൽ അടങ്ങിയിരിക്കുന്ന ചേരുവകൾ, പ്രതിദിനം ഉപയോഗിക്കേണ്ട അളവ്, ഉപയോഗിക്കേണ്ട സമയം, മുന്നറിയിപ്പുകൾ എന്നിവ കൃത്യമായി മനസ്സിലാക്കണം.
ഉൽപ്പന്നത്തിന്റെ കാലാവധി, നിർമാതാവിന്റെ വിവരങ്ങൾ, ഗുണനിലവാര പരിശോധന സംബന്ധിച്ച വിശദാംശങ്ങൾ എന്നിവയും പരിശോധിക്കേണ്ടതാണ്. പരസ്യങ്ങളിൽ പറയുന്ന ഗുണനിലവാര അവകാശവാദങ്ങൾ മാത്രം ഉൽപ്പന്നത്തിന്റെ സുരക്ഷിതത്വത്തിനും ഫലപ്രാപ്തിക്കും ഉറപ്പല്ല. സംശയമുള്ള ഉൽപ്പന്നങ്ങൾ ഉപയോഗിക്കുന്നതിന് മുമ്പ് ആരോഗ്യവിദഗ്ധന്റെ അഭിപ്രായം തേടണം.
6. ഉപയോഗിച്ചുതുടങ്ങിയാൽ ശരീരത്തിലെ മാറ്റങ്ങൾ നിരീക്ഷിക്കണം
സപ്ലിമെന്റ് ഉപയോഗം ആരംഭിച്ചതിനുശേഷം അസാധാരണമായ ശാരീരിക ലക്ഷണങ്ങൾ അനുഭവപ്പെടുന്നുണ്ടോ എന്ന് ശ്രദ്ധിക്കണം. തലകറക്കം, അമിതമായ ക്ഷീണം, ശ്രദ്ധക്കുറവ്, ബ്രെയിൻ ഫോഗ്, വയറുവേദന, ഗ്യാസ്, വയറിളക്കം, രക്തസമ്മർദത്തിലെ വ്യതിയാനങ്ങൾ തുടങ്ങിയവ അവഗണിക്കരുത്.
ഇത്തരം ലക്ഷണങ്ങൾ സപ്ലിമെന്റിന്റെ ഉപയോഗം മൂലമാണെന്ന് സ്വയം തീരുമാനിക്കാനാവില്ല. എങ്കിലും അവ ആരംഭിച്ച സമയം, ഉപയോഗിക്കുന്ന ഉൽപ്പന്നം, അതിന്റെ അളവ് തുടങ്ങിയ വിവരങ്ങൾ ഡോക്ടറെ അറിയിക്കണം. ഗുരുതരമായ ലക്ഷണങ്ങളുണ്ടായാൽ അടിയന്തര വൈദ്യസഹായം തേടുകയും വേണം.
സപ്ലിമെന്റുകളേക്കാൾ പ്രധാനം ആരോഗ്യകരമായ ജീവിതശൈലി
സോഷ്യൽ മീഡിയയിൽ പ്രചാരം നേടുന്ന ഓരോ ആരോഗ്യ ഉൽപ്പന്നവും നമുക്ക് ആവശ്യമുള്ളതായിരിക്കണമെന്നില്ല. ശരീരത്തിന് ആവശ്യമായ പോഷകങ്ങൾ ലഭിക്കുന്നുണ്ടെന്ന് ഉറപ്പാക്കാൻ സമീകൃതാഹാരത്തിനാണ് പ്രാധാന്യം നൽകേണ്ടത്. അതിനൊപ്പം മതിയായ ഉറക്കം, കൃത്യമായ വ്യായാമം, ആരോഗ്യകരമായ ജീവിതശൈലി, ആവശ്യമായ പരിശോധനകൾ എന്നിവയും പ്രധാനമാണ്.
പോഷകക്കുറവോ പ്രത്യേക ആരോഗ്യാവശ്യമോ ഉള്ളവർക്ക് വിദഗ്ധരുടെ നിർദേശപ്രകാരം സപ്ലിമെന്റുകൾ ഉപയോഗിക്കാം. എന്നാൽ ട്രെൻഡുകൾക്കും പരസ്യങ്ങൾക്കും പിന്നാലെ പോയി അനാവശ്യമായി ഇവ ഉപയോഗിക്കുന്നത് ഗുണത്തേക്കാൾ ദോഷം ചെയ്തേക്കാം. മറ്റുള്ളവരുടെ ആരോഗ്യശീലങ്ങൾ അനുകരിക്കുന്നതിനുപകരം സ്വന്തം ശരീരത്തിന്റെ ആവശ്യങ്ങൾ തിരിച്ചറിഞ്ഞ് തീരുമാനമെടുക്കുന്നതാണ് ഏറ്റവും നല്ലത്.
