പ്രായം പ്രണയത്തിന് തടസ്സമല്ലെന്ന് പറയുന്നവർക്കിടയിൽ സമൂഹമാധ്യമങ്ങളിൽ ശ്രദ്ധ നേടുകയാണ് ഉത്തർപ്രദേശിൽ നിന്നുള്ള 75-കാരനായ രാംസുഗറിന്റെയും 30-കാരിയായ റാണി രാജ്പുതിന്റെയും പ്രണയകഥ. 45 വർഷത്തെ പ്രായവ്യത്യാസമുള്ള ഇരുവരും വിവാഹിതരാകാൻ തീരുമാനിച്ചതാണ് ഇപ്പോൾ ചർച്ചകൾക്ക് വഴിവച്ചിരിക്കുന്നത്. ഇരുവരും ഏകദേശം ഒരു വർഷമായി പ്രണയത്തിലാണെന്നാണ് റിപ്പോർട്ടുകൾ. വിവാഹനിശ്ചയ ചടങ്ങും കഴിഞ്ഞതായും നവരാത്രിക്ക് ശേഷം വിവാഹം നടത്താനാണ് തീരുമാനമെന്നുമാണ് പുറത്തുവരുന്ന വിവരം.
കൂട്ടുകാരിയെ കാണാനെത്തി, പിതാവുമായി പ്രണയത്തിലായി
ഉത്തർപ്രദേശിലെ ഔറയ്യ ജില്ലക്കാരനാണ് രാംസുഗർ. ഇൻസ്റ്റഗ്രാമിൽ റീൽസ് ഉൾപ്പെടെയുള്ള ഉള്ളടക്കങ്ങൾ പങ്കുവയ്ക്കുന്ന റാണി രാജ്പുത്, രാംസുഗറിന്റെ മകളെ കാണാനായി പതിവായി വീട്ടിലെത്താറുണ്ടായിരുന്നുവെന്നാണ് റിപ്പോർട്ടുകൾ. ഈ സന്ദർശനങ്ങൾക്കിടയിൽ ഇരുവരും തമ്മിൽ അടുപ്പം വർധിക്കുകയും സൗഹൃദം പ്രണയത്തിലേക്ക് വഴിമാറുകയുമായിരുന്നുവെന്നാണ് പുറത്തുവരുന്ന വിവരങ്ങൾ.
വിവാഹനിശ്ചയത്തിന്റേതെന്ന് കരുതുന്ന ദൃശ്യങ്ങളാണ് ഇപ്പോൾ സമൂഹമാധ്യമങ്ങളിൽ വ്യാപകമായി പ്രചരിക്കുന്നത്. ഇരുവരും സന്തോഷത്തോടെ നിൽക്കുന്നതും ചുറ്റും കുടുംബാംഗങ്ങളും നാട്ടുകാരുമുള്ളതുമായ വീഡിയോ നിരവധി പേരുടെ ശ്രദ്ധ പിടിച്ചുപറ്റി. എന്നാൽ, ഇരുവരുടെയും ബന്ധത്തെക്കുറിച്ചുള്ള വിവരങ്ങൾ സ്വതന്ത്രമായി സ്ഥിരീകരിച്ചിട്ടില്ല.
ആശംസകളും പരിഹാസങ്ങളും; രണ്ടുതട്ടിൽ സോഷ്യൽ മീഡിയ
വിവാഹവാർത്ത എക്സിൽ പ്രചരിച്ചതോടെ അനുകൂലിച്ചും വിമർശിച്ചും നിരവധി പേരാണ് രംഗത്തെത്തിയത്. പ്രണയത്തിനും വിവാഹത്തിനും പ്രായം തടസ്സമാകരുതെന്ന് അഭിപ്രായപ്പെട്ടവർ ഇരുവർക്കും ആശംസകൾ നേർന്നു. അതേസമയം, 45 വർഷത്തെ പ്രായവ്യത്യാസം ചൂണ്ടിക്കാട്ടി പരിഹസിക്കുന്നവരും കുറവല്ല.
‘ജാറ്റ് വേൾഡ്’ എന്ന എക്സ് അക്കൗണ്ടിൽ നിന്ന് ഇരുവർക്കും ആശംസകൾ നേർന്നിരുന്നു. എന്നാൽ, രാംസുഗറിനെ ‘ഷുഗർ ഡാഡി’ എന്ന് വിശേഷിപ്പിച്ചുള്ള പരിഹാസങ്ങളും ബന്ധത്തിന്റെ പിന്നിലെ ഉദ്ദേശ്യങ്ങളെക്കുറിച്ചുള്ള ചോദ്യങ്ങളും ഉയർന്നു. രാംസുഗറിന്റെ സ്വത്തിനെക്കുറിച്ചുള്ള ഊഹാപോഹങ്ങളും ചിലർ പങ്കുവച്ചു.
പ്രായവ്യത്യാസം മുൻനിർത്തിയുള്ള ചർച്ചകൾക്കിടയിലും ഇരുവരുടെയും വിവാഹതീരുമാനമാണ് ഇപ്പോൾ സമൂഹമാധ്യമങ്ങളിലെ പ്രധാന ചർച്ചാവിഷയം. വ്യക്തികളുടെ സ്വകാര്യജീവിതത്തെയും തീരുമാനങ്ങളെയും എങ്ങനെ സമീപിക്കണമെന്ന ചോദ്യവും ഈ സംഭവം വീണ്ടും ഉയർത്തുന്നു.
