ഫുട്‌ബോൾ മൈതാനത്തെ നേട്ടങ്ങൾക്കപ്പുറം ശാസ്ത്രലോകത്തും ഇടംപിടിച്ച് അർജന്റീനയുടെ ഇതിഹാസ താരം ലയണൽ മെസ്സി. പെറുവിൽ കണ്ടെത്തിയ പുതിയൊരു സസ്യ ഇനത്തിന് മെസ്സിയുടെ പേര് നൽകിയിരിക്കുകയാണ് ഗവേഷകർ. ‘സാൽവിയ മെസ്സി’ എന്നാണ് സസ്യത്തിന് പേരിട്ടിരിക്കുന്നത്. ഫുട്‌ബോൾ ലോകത്തെ മഹാനായ താരത്തിന് ശാസ്ത്രലോകം നൽകുന്ന വേറിട്ട ആദരമായാണ് ഈ നടപടി ശ്രദ്ധ നേടുന്നത്.
പെറുവിലെ മധ്യ, തെക്കൻ ആൻഡീസ് പർവതനിരകളിലാണ് ഈ സസ്യം കാണപ്പെടുന്നത്. അർജന്റീന ദേശീയ ഫുട്‌ബോൾ ടീമിന്റെ ജഴ്‌സിയെ ഓർമിപ്പിക്കുന്ന വെള്ളയും ഇളം നീലയും കലർന്ന പൂക്കളാണ് സസ്യത്തിന്റെ പ്രധാന പ്രത്യേകത. മെസ്സി 2005ൽ സീനിയർ ദേശീയ ടീമിൽ അരങ്ങേറ്റം കുറിച്ച കാലംമുതൽ അർജന്റീനയുടെ പരമ്പരാഗത ജഴ്‌സിയിൽ ഈ നിറങ്ങൾ സുപ്രധാനമാണ്. സസ്യത്തിന്റെ പൂക്കളിലെ നിറസാമ്യമാണ് മെസ്സിയുടെ പേര് നൽകാൻ ഗവേഷകർക്ക് പ്രചോദനമായത്.
സസ്യങ്ങളുടെ വർഗീകരണവും നാമകരണവും സംബന്ധിച്ച പഠനങ്ങൾ പ്രസിദ്ധീകരിക്കുന്ന അന്താരാഷ്ട്ര ജേണലായ *ഫൈറ്റോടാക്‌സ*യുടെ ഒക്ടോബർ പതിപ്പിലാണ് പുതിയ സസ്യത്തെക്കുറിച്ചുള്ള കണ്ടെത്തൽ പ്രസിദ്ധീകരിച്ചിരിക്കുന്നത്. എന്നാൽ, വളരെ പരിമിതമായ ഭൂപ്രദേശത്ത് മാത്രമാണ് ഈ സസ്യം വളരുന്നത്. അതിനാൽ വംശനാശഭീഷണി നേരിടുന്ന സസ്യങ്ങളുടെ വിഭാഗത്തിലാണ് ഗവേഷകർ ഇതിനെ ഉൾപ്പെടുത്തിയിരിക്കുന്നത്.
പ്രശസ്ത വ്യക്തികളോടുള്ള ആദരസൂചകമായി സസ്യങ്ങൾക്കും മറ്റ് ജീവിവർഗങ്ങൾക്കും അവരുടെ പേരുകൾ നൽകുന്ന ശാസ്ത്രീയ നാമകരണ രീതിയുടെ ഭാഗമായാണ് ‘സാൽവിയ മെസ്സി’ എന്ന പേര് സ്വീകരിച്ചത്. ഇതിൽ ‘സാൽവിയ’ സസ്യത്തിന്റെ ജനുസ്സിന്റെ പേരാണ്. ‘മെസ്സി’ എന്നത് അർജന്റീനയുടെ ഇതിഹാസ താരത്തോടുള്ള ആദരവിനെയാണ് സൂചിപ്പിക്കുന്നത്.
ലോകകപ്പ് ഉൾപ്പെടെ ഫുട്‌ബോളിലെ നിരവധി പ്രധാന നേട്ടങ്ങൾ സ്വന്തമാക്കിയ മെസ്സിയുടെ പേരിന് ഇതോടെ സസ്യശാസ്ത്ര രേഖകളിലും ഇടം ലഭിച്ചിരിക്കുകയാണ്. ഗോളുകളും കിരീടങ്ങളും റെക്കോർഡുകളും കൊണ്ട് സമ്പന്നമായ കരിയറിന് പുറമേ, പ്രകൃതിയിലെ പുതിയൊരു സസ്യ ഇനത്തിലൂടെ കൂടി മെസ്സിയുടെ പേര് ഓർമിക്കപ്പെടും.
