കെനിയയിൽ ലോകാവസാനമെന്ന ഭീതി പരത്തി അനുയായികളെ പട്ടിണിക്കിട്ട് കൊലപ്പെടുത്തിയെന്ന കേസിൽ പാസ്റ്റർ പോൾ മക്കെൻസിയും അനുയായികളും കുറ്റക്കാരാണെന്ന് മൊംബാസ കോടതി. 2023ൽ രാജ്യത്തെ നടുക്കിയ ഷാക്കഹോല കൂട്ടമരണക്കേസിലാണ് പുതിയ നടപടി. മക്കെൻസിയും ഇയാളുടെ സഭയിലെ പ്രമുഖരായ 30 പേരുമാണ് കേസിലെ പ്രതികൾ. 190 കുട്ടികളുടെയും ഒരു മുതിർന്നയാളുടെയും മരണവുമായി ബന്ധപ്പെട്ട കേസിലാണ് നിലവിൽ ശിക്ഷ വിധിച്ചിരിക്കുന്നത്. മറ്റ് മരണങ്ങളുമായി ബന്ധപ്പെട്ട കേസുകളിൽ നടപടികൾ തുടരും.
കുട്ടികൾ മുതൽ മുതിർന്നവർ വരെ പട്ടിണിക്കിരയായി
കെനിയയിലെ ഷാക്കഹോല വനമേഖലയിൽ കുഴിച്ചിട്ട നിലയിൽ 400ലേറെ പേരുടെ മൃതദേഹങ്ങൾ കണ്ടെത്തിയതോടെയാണ് സംഭവം ലോകശ്രദ്ധ നേടിയത്. മൃതദേഹങ്ങളിൽ ഭൂരിഭാഗവും അഴുകിയ നിലയിലായിരുന്നു. ആകെ 26 പേരെ മാത്രമാണ് തിരിച്ചറിയാൻ കഴിഞ്ഞത്. സംഭവത്തിൽ നടത്തിയ അന്വേഷണത്തിലാണ് പോൾ മക്കെൻസിയുടെ നേതൃത്വത്തിലുള്ള മതസംഘത്തിന്റെ പങ്ക് പുറത്തുവന്നത്.
ലോകാവസാനം അടുത്തെത്തിയെന്നും അതിന് മുൻപ് സ്വർഗത്തിലെത്താൻ പട്ടിണി കിടന്ന് മരിക്കണമെന്നുമായിരുന്നു മക്കെൻസി അനുയായികളെ വിശ്വസിപ്പിച്ചിരുന്നത്. ഇയാളുടെ നിർദേശപ്രകാരം നാല് ഘട്ടങ്ങളിലായാണ് പട്ടിണി മരണങ്ങൾ ആസൂത്രണം ചെയ്തതെന്നാണ് റിപ്പോർട്ടുകൾ. ആദ്യം കുട്ടികളെയും പിന്നീട് സ്ത്രീകളെയും യുവാക്കളെയും ഒടുവിൽ മുതിർന്ന പുരുഷന്മാരെയും പട്ടിണിക്കിടുകയായിരുന്നു രീതി.
കുട്ടികളെ മുറികളിൽ പൂട്ടിയിട്ട് ഭക്ഷണവും വെള്ളവും നൽകാതെ മരണത്തിലേക്ക് തള്ളിവിട്ടതായും അന്വേഷണത്തിൽ കണ്ടെത്തിയിരുന്നു. മതവിശ്വാസത്തിന്റെ പേരിൽ അനുയായികളെ കടുത്ത നിയന്ത്രണങ്ങൾക്ക് വിധേയരാക്കിയതായും റിപ്പോർട്ടുകളുണ്ട്.
വിദ്യാഭ്യാസത്തിനും ചികിത്സയ്ക്കും വിലക്ക്
അനുയായികൾ വിദ്യാഭ്യാസ സ്ഥാപനങ്ങളിൽ പോകുന്നതും അസുഖം ബാധിച്ചാൽ ആശുപത്രികളിൽ ചികിത്സ തേടുന്നതും മക്കെൻസി വിലക്കിയിരുന്നു. ഇത്തരം സ്ഥാപനങ്ങൾ ചെകുത്താന്റേതാണെന്നായിരുന്നു ഇയാളുടെ പ്രചാരണം. അനുയായികൾക്കായി പ്രത്യേക പാർപ്പിടകേന്ദ്രങ്ങളും ഒരുക്കിയിരുന്നു. ക്യാംപുകളുടെ മാതൃകയിൽ നിർമിച്ച ഈ കേന്ദ്രങ്ങൾക്ക് ബൈബിളിലെ സ്ഥലങ്ങളുടെ പേരുകളാണ് നൽകിയിരുന്നത്.
മക്കെൻസി നേതൃത്വം നൽകിയ ഗുഡ് ന്യൂസ് ഇന്റർനാഷണൽ ചർച്ചിലെ പ്രമുഖരായ 30 പേരും കേസിൽ പ്രതികളാണ്. മതപ്രചാരണത്തിന്റെ മറവിൽ നടന്ന കൂട്ടമരണങ്ങൾ കെനിയയിൽ വലിയ പ്രതിഷേധത്തിനും അന്വേഷണങ്ങൾക്കും വഴിവെച്ചിരുന്നു.
400ലേറെ പേരുടെ മരണത്തിനിടയാക്കിയ സംഭവത്തിൽ ശേഷിക്കുന്ന മരണങ്ങളുമായി ബന്ധപ്പെട്ട നിയമനടപടികൾ കൂടി പൂർത്തിയാകുന്നതോടെ കേസിന്റെ തുടർനടപടികൾ കൂടുതൽ നിർണായകമാകും.
