തിരുവനന്തപുരം: കേരളത്തിൽ വൈദ്യുതി ബില്ലിൽ അധികബാധ്യത വരുത്താൻ സാധ്യതയുള്ള പുതിയ താരിഫ് നയം വൈദ്യുതി റെഗുലേറ്ററി കമ്മിഷൻ വിജ്ഞാപനം ചെയ്തു. വൈദ്യുതി ബോർഡിന്റെ മുൻകാലനഷ്ടമായ 5000 കോടി രൂപ നാലുവർഷംകൊണ്ട് സർച്ചാർജിലൂടെ ഉപഭോക്താക്കളിൽനിന്ന് ഈടാക്കാനാണ് തീരുമാനം. പുതുക്കിയ വൈദ്യുതിനിരക്കും സർച്ചാർജും 2027 ഏപ്രിൽ ഒന്നുമുതൽ പ്രാബല്യത്തിൽ വരും.
പുതിയ നയത്തിന്റെ അടിസ്ഥാനത്തിലായിരിക്കും 2027-28 മുതൽ 2031-32 വരെയുള്ള അഞ്ചുവർഷത്തെ വൈദ്യുതിനിരക്കുകൾ കമ്മിഷൻ നിശ്ചയിക്കുക. ഇതിൽ നാലുവർഷവും സർച്ചാർജ് ബാധകമാകും. വ്യാവസായിക ഉപഭോക്താക്കൾക്ക് ബില്ലിലെ നിശ്ചിത നിരക്കിന്റെ അടിസ്ഥാനത്തിലായിരിക്കും സർച്ചാർജ് കണക്കാക്കുക. മറ്റു വിഭാഗങ്ങളിൽ ഫിക്സഡ് ചാർജിന്റെയും വൈദ്യുതിനിരക്കിന്റെയും നിശ്ചിത ശതമാനം ഈടാക്കും.
വൈദ്യുതി ഉൽപ്പാദനത്തിനുള്ള ചെലവിൽ ഇന്ധനവില വർധനമൂലം ഉണ്ടാകുന്ന അധികബാധ്യത നികത്താൻ പ്രതിമാസ ഇന്ധനസർച്ചാർജ് ഈടാക്കുന്നുണ്ട്. ഇതുവരെ ദീർഘകാല വൈദ്യുതിക്കരാറുകളിലെ അധികചെലവാണ് പ്രധാനമായും ഇതിൽ ഉൾപ്പെടുത്തിയിരുന്നത്. പുതിയ നയപ്രകാരം ഹ്രസ്വകാല കരാറുകളിലൂടെയും അടിയന്തരമായും വൈദ്യുതി വാങ്ങുമ്പോഴുണ്ടാകുന്ന അധികബാധ്യതയും കണക്കിലെടുക്കും.
ഇത്തരം അധികചെലവ് റെഗുലേറ്ററി കമ്മിഷന്റെ മുൻകൂർ അംഗീകാരമില്ലാതെ നേരിട്ട് ഉപഭോക്താക്കളിൽനിന്ന് ഈടാക്കാൻ വൈദ്യുതി കമ്പനികൾക്ക് അനുമതിയുണ്ടാകും. അധികബാധ്യത ഉടൻ ഉപഭോക്താക്കളിലേക്ക് കൈമാറുകയെന്ന ലക്ഷ്യത്തോടെയാണ് കേന്ദ്രം ഈ ചട്ടം കൊണ്ടുവന്നത്. എന്നാൽ, ശരാശരി വൈദ്യുതിവിലയുടെ നാലുശതമാനത്തിൽ കൂടുതൽ തുക ഇന്ധനസർച്ചാർജായി നേരിട്ട് ഈടാക്കുന്നതിന് നിയന്ത്രണമുണ്ടാകും.
വൈദ്യുതി ഉപഭോഗം കൂടുതലുള്ള പീക്ക് സമയത്തിന്റെ നിർവചനത്തിലും മാറ്റമുണ്ട്. നിലവിൽ വൈകിട്ട് ആറുമുതൽ രാത്രി പത്തുവരെയാണ് പീക്ക് സമയമായി കണക്കാക്കുന്നത്. പുതിയ നയപ്രകാരം ഇത് രാത്രി 11.30 വരെ നീളും.
പീക്ക് സമയത്ത് ഉയർന്ന നിരക്ക് ഈടാക്കുന്നതിനായി കൂടുതൽ ഉപഭോക്തൃവിഭാഗങ്ങളിൽ ടൈം ഓഫ് ഡേ (ടി.ഒ.ഡി.) മീറ്ററുകൾ സ്ഥാപിക്കണമെന്നും നയം നിർദേശിക്കുന്നു. അതേസമയം, രാവിലെ എട്ടുമുതൽ വൈകിട്ട് ആറുവരെയും രാത്രി 11.30 മുതൽ അടുത്ത ദിവസം രാവിലെ എട്ടുവരെയും കുറഞ്ഞ നിരക്ക് ഈടാക്കുന്ന രീതിയും നടപ്പാക്കണം.
വൈദ്യുതി വിതരണത്തിനുള്ള യഥാർഥ ചെലവിന് അനുസൃതമായി നിരക്ക് നിശ്ചയിക്കണമെന്ന സുപ്രീംകോടതി വിധി നടപ്പാക്കണമെന്നും താരിഫ് നയം നിർദേശിക്കുന്നു. ഗാർഹിക ഉപഭോക്താക്കളുടെ ഫിക്സഡ് ചാർജ് കണക്ടഡ് ലോഡിന്റെ അടിസ്ഥാനത്തിൽ നിശ്ചയിക്കണമെന്നാണ് മറ്റൊരു നിർദേശം.
വീടുകളിൽ വൈദ്യുതി സംഭരിക്കുന്നതിനുള്ള സംവിധാനം സ്ഥാപിച്ച് രാത്രികാലത്ത് അധിക വൈദ്യുതി ഗ്രിഡിലേക്ക് നൽകുന്നവർക്ക് പ്രോത്സാഹനകരമായ നിരക്ക് നൽകണമെന്നും നയത്തിൽ വ്യക്തമാക്കുന്നു.
പുതിയ താരിഫ് നയം നടപ്പാകുന്നതോടെ വൈദ്യുതി ഉപയോഗിക്കുന്ന സമയത്തിനും കണക്ടഡ് ലോഡിനും അനുസരിച്ച് ഉപഭോക്താക്കളുടെ ബില്ലിൽ മാറ്റമുണ്ടാകാൻ സാധ്യതയുണ്ട്. എന്നാൽ, ഓരോ വിഭാഗത്തിനും ബാധകമാകുന്ന പുതുക്കിയ നിരക്കുകൾ കമ്മിഷൻ പിന്നീട് നിശ്ചയിക്കും.
